कार्यालयको परिचय
वि.सं. २०१८ साल बैशाख १ गते नेपाललाई १४ अञ्चल ७५ जिल्लामा विभाजन गरिँदा खोटाङ जिल्लाको सदरमुकाम खोटाङवजार बनाएर जिल्ला पञ्चायत कार्यालय खोटाङवजारमा स्थापना गरिएको थियो । वि.सं. २०२२ सालमा जिल्ला पञ्चायत कार्यालय दिक्तेलमा सारी विधिवत रुपमा खोटाङ जिल्लाको सदरमुकाम दिक्तेलमा सारियो । खोटाङ जिल्लाको भौगोलिक अवस्थिति, जनसंख्याको वितरण तथा राजनैतिक दलहरुको मागलाई समेत मध्यनजर गरी पुरानो सदरमुकाम रहेको स्थान खोटाङवजारमा वि.सं. २०५७ सालमा यस इलाका प्रशासन कार्यालयको स्थापना भयो । तत्कालिन समयमा यस इलका प्रशासन कार्यालयको सेवा क्षेत्र भित्र २१ वटा गा.वि.स. हरु रहेकोमा संघीयता कार्यान्वयन भएसंगै ३ वटा स्थानीय तहहरुः- १) खोटेहाङ गाउँपालिका, २) जन्तेढुङ्गा गाउँपालिका र ३) वराहपोखरी गाउँपालिका पर्दछन् । जिल्ला सदरमुकाम दिक्तेलबाट करिब ९५ कि.मी. दक्षिण तर्फ रहेको यस इलाका प्रशासन कार्यालयको सेवा क्षेत्र भित्र राष्ट्रिय जनगणना प्रारम्भिक नतिजा, २०७८ अनुसार ४०,४७९ जनसंख्या बसोबास गर्दछन् ।